پاکستان اور لیبیا کے درمیان تجارت، تعلیم اور کاروباری روابط بڑھانے پر اتفاق

پاکستان اور لیبیا کے درمیان تجارت، تعلیم اور کاروباری روابط کو مزید وسعت دینے پر اتفاق کیا گیا ہے۔ ترجمان دفترِ خارجہ کے مطابق نائب وزیراعظم و وزیرِ خارجہ سینیٹر محمد اسحاق ڈار اور لیبیا کے قائم مقام وزیرِ خارجہ الطاہر الباعور کے درمیان ایک اہم ملاقات ہوئی، جس میں اسحاق ڈار نے لیبیا کے ساتھ دیرینہ دوستانہ تعلقات کو مزید مضبوط بنانے کے عزم کا اعادہ کیا۔ ملاقات کے دوران دونوں رہنماؤں نے علاقائی و عالمی صورتحال سمیت بالخصوص مشرقِ وسطیٰ میں بدلتی ہوئی صورتحال، اس کے علاقائی امن، توانائی کی فراہمی اور عالمی معیشت پر مرتب ہونے والے اثرات کا تفصیل سے جائزہ لیا، جبکہ ترقی پذیر ممالک پر پڑنے والے معاشی اثرات پر بھی تبادلہ خیال کیا گیا۔

ملاقات کے دوران لیبیا کے قائم مقام وزیرِ خارجہ نے علاقائی امن و استحکام کی خاطر پاکستان کی تعمیری اور متحرک سفارتی کوششوں کی تعریف کی۔ اس موقع پر نائب وزیراعظم اسحاق ڈار نے زور دیا کہ موجودہ علاقائی چیلنجز کا حل صرف مکالمے اور سفارت کاری کے ذریعے ہی ممکن ہے۔ انہوں نے تمام فریقین پر زور دیا کہ وہ علاقائی استحکام کی بحالی اور امن کے فروغ کے لیے اسلام آباد مفاہمتی یادداشت کے فریم ورک کی طرف واپس آئیں۔