کفایت شعاری مہم: قومی اسمبلی کا 50 فیصد عملہ گھر سے کام کرے گا

ملک میں جاری کفایت شعاری مہم کے تحت قومی اسمبلی اور سینیٹ سیکرٹریٹ نے ایندھن کی بچت اور اخراجات میں کمی کے لیے متعدد سخت اقدامات نافذ کرنے کا اعلان کر دیا ہے۔ جاری کردہ ہدایات کے مطابق قومی اسمبلی کا 50 فیصد عملہ دفاتر میں حاضری دے گا جبکہ باقی 50 فیصد عملہ گھر سے کام (Work from Home) کرے گا۔ گھر سے کام کرنے والے ملازمین کے لیے ضروری ہوگا کہ وہ ای میل، فون اور واٹس ایپ پر دستياب رہیں اور ہدایت ملنے پر محض ایک گھنٹے کے نوٹس پر دفتر پہنچیں۔ اس کے علاوہ کوئی بھی ملازم پیشگی اجازت کے بغیر اسٹیشن نہیں چھوڑ سکے گا۔ سرکاری گاڑیوں کے لیے ایندھن کے کوٹے میں اگلے تین ماہ کے لیے 50 فیصد کٹوتی کر دی گئی ہے جبکہ ہر قسم کی نجی و سرکاری گاڑیوں کی نئی خریداری پر مکمل پابندی عائد کر دی گئی ہے۔

مالی سال 2026-27 کے غیر تنخواہ بجٹ (Non-salary budget) میں ماہانہ بنیادوں پر 5 فیصد کٹوتی کی جائے گی۔ تمام تر اجلاس ترجیحاً ٹیلی کانفرنسنگ کے ذریعے ہوں گے جبکہ اجلاسوں کی تعداد کو بھی کم سے کم رکھا جائے گا۔ دوسری جانب چیئرمین سینیٹ نے بھی سینیٹ سیکرٹریٹ کے لیے ان ہی کفایت شعاری اقدامات کی منظوری دے دی ہے۔ سینیٹ میں اجلاس نہ ہونے کی صورت میں جمعہ کے روز ملازمین گھر سے کام کریں گے جبکہ پیر سے جمعرات تک دفتری اوقات صبح 9 سے شام 4 بجے تک ہوں گے۔ سینیٹ کے تمام غیر ملکی دوروں اور سرکاری عشائیوں پر تین ماہ کے لیے پابندی لگا دی گئی ہے، تاہم آئی ٹی سے متعلق خریداریوں کو استثنیٰ حاصل ہو گا۔

دوسری جانب، عدالت نے علیمہ خان کی نظر بندی کے خلاف دائر درخواست پر سماعت وکیل کی جانب سے تیاری کے لیے مہلت مانگنے پر 25 ستمبر تک ملتوی کر دی ہے۔