ہنگو میں شہید ہونے والے فوجی افسروں اور جوانوں کی نمازِ جنازہ ادا

خیبر پختونخوا کے ضلع ہنگو میں خوارج سے فائرنگ کے شدید تبادلے میں جامِ شہادت نوش کرنے والے پاک فوج کے 6 شہدا کی نمازِ جنازہ پشاور میں ادا کر دی گئی۔ پاک فوج کے شعبہ تعلقاتِ عامہ (آئی ایس پی آر) کے مطابق پشاور میں منعقدہ نمازِ جنازہ میں وفاقی وزیرِ داخلہ محسن نقوی، گورنر خیبر پختونخوا فیصل کریم کنڈی، کور کمانڈر پشاور، شہدا کے لواحقین اور اعلیٰ سول و عسکری حکام نے بڑی تعداد میں شرکت کی۔

آئی ایس پی آر کے مطابق ہنگو آپریشن میں شہید ہونے والوں میں کیپٹن ابوذر فاروق، لیفٹیننٹ شیراز بابر، سپاہی شکیل احمد، سپاہی حمزہ، سپاہی محمد عثمان عزیز اور نان کمبیٹنٹ ملازم غلام سجاد شامل ہیں۔ نمازِ جنازہ کے بعد شہدا کے جسدِ خاکی ان کے آبائی علاقوں کو روانہ کر دیے گئے ہیں جہاں انہیں مکمل فوجی اعزاز کے ساتھ سپردِ خاک کیا جائے گا۔ عسکری حکام کا کہنا ہے کہ دفاعِ وطن کے لیے شہدا کی یہ لازوال قربانیاں دہشت گردی کے مکمل خاتمے کے لیے سیکیورٹی فورسز کے غیر متزلزل عزم کو مزید تقویت دیتی ہیں۔ واضح رہے کہ گزشتہ روز سیکیورٹی فورسز کے اس آپریشن میں 8 خوارجی دہشت گردوں کو جہنم واصل کیا گیا تھا جبکہ 6 جوانوں نے جامِ شہادت نوش کیا۔