اسلام آباد: پمز اسپتال میں 30 ستمبر تک ہائی الرٹ، عملے کی چھٹیاں محدود

اسلام آباد کے سب سے بڑے وفاقی ہسپتال ‘پاکستان انسٹیٹیوٹ آف میڈیکل سائنسز’ (پمز) میں کسی بھی ممکنہ ہنگامی صورتِ حال سے نمٹنے کے لیے فوری طور پر ہائی الرٹ نافذ کر دیا گیا ہے۔ پمز انتظامیہ کی جانب سے جاری کردہ باضابطہ سرکلر کے مطابق یہ ہائی الرٹ 30 ستمبر 2026ء تک برقرار رہے گا۔ اس دوران تمام طبی اور غیر طبی شعبہ جات کے سربراہان سمیت ڈاکٹرز، نرسز، پیرامیڈیکس اور معاون عملے کی 24 گھنٹے موجودگی کو حتمی بنانے کی ہدایت کی گئی ہے، جبکہ طبی ضرورت کے علاوہ تمام ملازمین کی چھٹیوں پر مکمل پابندی عائد کر دی گئی ہے۔

انتظامیہ نے پمز کی تمام اہم شعبہ جات بشمول ایمرجنسی، آئی سی یو، آپریشن تھیٹرز، ٹراما سینٹر، بلڈ بینک، فارمیسی اور ڈائیگناسٹک سروسز کو 24 گھنٹے مکمل فعال رکھنے کا حکم دیا ہے۔ ایمرجنسی میں مریضوں کے رش کو مدنظر رکھتے ہوئے اضافی بیڈز، اسٹریچرز، آکسیجن اور ضروری ادویات کا وافر اسٹاک یقینی بنانے کے ساتھ ساتھ ایس ڈبلیو فور (SW-4) وارڈ میں 20 خصوصی بیڈز مختص کر دیے گئے ہیں۔ ایمرجنسی ہسپتال کے لیے ڈاکٹر شرجیل ظہیر کو فوکل پرسن مقرر کیا گیا ہے۔ مزید برآں، نیورو، آرتھوپیڈک اور جنرل سرجری کے آن کال عملے کو متحرک رہنے اور ہسپتال کے داخلی راستوں پر سیکیورٹی کے سخت ترین انتظامات برقرار رکھنے کی ہدایات بھی جاری کی گئی ہیں۔