احتجاج اور دھرنوں سے معیشت کو یومیہ 120 ارب کا نقصان ہوگا: وفاقی وزیر خزانہ

وفاقی وزیرِ خزانہ محمد اورنگزیب نے اسلام آباد میں پریس کانفرنس کرتے ہوئے کہا ہے کہ پاکستان اب معاشی استحکام کا مرحلہ کامیابی سے طے کرنے کے بعد پائیدار معاشی ترقی کی جانب گامزن ہے، تاہم ایسے میں احتجاج، مارچ اور دھرنوں سے قومی معیشت کو یومیہ 120 ارب روپے کے بھاری نقصان کا سامنا کرنا پڑے گا۔ انہوں نے کہا کہ موجودہ معاشی منظرنامے میں احتجاجی سیاست اور ہڑتالیں سمجھ سے بالاتر ہیں، کیونکہ معاشی سرگرمیوں میں تعطل کا براہِ راست اثر عام عوام، بالخصوص دیہاڑی دار طبقے اور چھوٹے کاروبار سے وابستہ افراد پر پڑتا ہے۔

وزیرِ خزانہ نے عالمی صورتحال پر بات کرتے ہوئے کہا کہ بدقسمتی سے مشرقِ وسطیٰ میں جاری کشیدگی کی وجہ سے سپلائی چین میں خلل، فریٹ اور انشورنس کے اخراجات میں اضافے نے عالمی تجارت پر برے اثرات مرتب کیے ہیں، تاہم حکومت اخراجات میں واضح کمی لا رہی ہے۔ انہوں نے ملکی معاشی اعشاریوں کی بہتری کو اجاگر کرتے ہوئے بتایا کہ ملک میں ترسیلاتِ زر میں مسلسل اضافہ ہو رہا ہے، زرمبادلہ کے ذخائر تاریخ کی بلند ترین سطح پر پہنچ چکے ہیں اور کرنٹ اکاؤنٹ بھی سرپلس میں ہے، جس کے باعث معاشی ترقی کے اس سفر میں مزید تیزی آئے گی۔ انہوں نے مزید کہا کہ ملک میں حالیہ دہشت گردی کی کارروائیوں کے پیچھے دشمن قوتیں ملوث ہیں۔