صاف ستھرا پنجاب صحت مند اور خوشحال مستقبل کی بنیاد ہے، مریم نواز

وزیراعلیٰ پنجاب مریم نواز شریف نے عالمی یومِ صفائی کے موقع پر جاری کردہ اپنے خصوصی پیغام میں کہا ہے کہ صفائی ہر مسلمان کے لیے نصف ایمان کا درجہ رکھتی ہے، جبکہ صاف ستھرا پنجاب صحت مند اور خوشحال مستقبل کی بنیادی ضمانت ہے۔ انہوں نے کہا کہ صوبائی حکومت کا ‘ستھرا پنجاب’ پراجیکٹ ایک نئے اور صحت مند پنجاب کی بنیاد ہے جو دنیا بھر میں اپنی نوعیت کا سب سے بڑا صفائی کا منصوبہ ہے۔ پہلی بار پنجاب کی تاریخ میں شہروں کے ساتھ ساتھ صوبے کے 25 ہزار سے زائد دیہاتوں کے لیے بھی صفائی کا ایک جامع اور منظم پروگرام شروع کیا گیا ہے، جہاں گلیوں اور سڑکوں کی صفائی کی نگرانی کے لیے ‘سیف سٹی’ کیمروں کا استعمال بھی کیا جا رہا ہے۔

وزیراعلیٰ مریم نواز نے زور دیتے ہوئے کہا کہ گلی محلوں کی صفائی کرانا حکومت کی ذمہ داری ہے، مگر اس کی بحالی اور صفائی کو برقرار رکھنا شہریوں کا بھی اجتماعی فرض ہے۔ اس پروگرام کے تحت ویسٹ مینجمنٹ، کچرے کی ری سائیکلنگ اور ماحول دوست اقدامات کو ترجیح دی جا رہی ہے۔ انہوں نے عوام سے اپیل کی کہ وہ کوڑا کرکٹ صحیح جگہ پر پھینکنے کے مناسب طریقے اپنائیں، پلاسٹک کے غیر ضروری استعمال سے پرہیز کریں اور اپنے اردگرد کے ماحول کو صاف و ستھرا رکھ کر ایک ترقی یافتہ اور صحت مند پاکستان کے قیام میں اپنا فعال کردار ادا کریں۔