فلسطینیوں پر مظالم: ناروے کی اسرائیلی آبادکاروں سے تجارت پر پابندی کی تجویز

مقبوضہ مغربی کنارے میں اسرائیلی آبادکاروں کی جانب سے مظلوم فلسطینیوں پر بڑھتے ہوئے مظالم کے ردِعمل میں ناروے نے اسرائیلی بستیوں سے ہونے والی ہر قسم کی تجارت پر مکمل پابندی عائد کرنے کی قانونی تجویز پیش کر دی ہے۔ نارویجن حکومت کی جانب سے تیار کردہ اس مجوزہ قانون کے تحت تجارتی پابندی کی خلاف ورزی کرنے والوں کو سخت قانونی کارروائی اور تین سال تک قید کی سزا کا سامنا کرنا پڑے گا۔ یہ مجوزہ پابندی مقبوضہ مغربی کنارے کی 265 اور مشرقی یروشلم (بیت المقدس) کی 14 اسرائیلی غیر قانونی بستیوں سے کی جانے والی تمام تر تجارتی سرگرمیوں کا احاطہ کرے گی۔

رپورٹ کے مطابق مقبوضہ علاقوں میں فلسطینی شہریوں کے خلاف اسرائیلی آبادکاروں کے جرائم، زمینوں پر قبضے اور تشدد کے واقعات میں تشویشناک حد تک اضافہ ہوا ہے، جس کے باعث عالمی برادری پر دباؤ بڑھ رہا ہے۔ ناروے کی اس اقدام کے تحت جن چیزوں پر پابندی کی تجویز دی گئی ہے ان میں بنیادی طور پر ان غیر قانونی بستیوں میں تیار ہونے والی زرعی مصنوعات، تجارتی اشیاء اور خدمات شامل ہیں۔ اگر یہ قانون منظور ہو جاتا ہے تو اس سے اسرائیلی آبادکاروں کے خلاف یورپی سطح پر سخت معاشی اقدامات کو فروغ ملے گا۔