مریم نواز کو دوسرے صوبوں سے خطرہ، مجھے پنجابیوں سے خطرہ نہیں: سہیل آفریدی

وزیراعلیٰ خیبرپختونخوا سہیل آفریدی نے کہا ہے کہ وزیراعلیٰ پنجاب مریم نواز کو دوسرے صوبوں سے خطرہ محسوس ہوتا ہے جبکہ انہیں پنجاب کے غیور عوام سے کوئی خطرہ نہیں۔ لاہور میں دو موریہ پل کے مقام پر پاکستان تحریک انصاف (پی ٹی آئی) کے کارکنوں سے خطاب کرتے ہوئے انہوں نے کہا کہ “پنجاب میرا ہے اور میں پنجابیوں کا ہوں”، مریم نواز کو پنجاب کے عوام نے مکمل طور پر مسترد کر دیا ہے اور وہ جعلی ووٹوں کے سہارے اقتدار کے ایوانوں میں بیٹھی ہیں۔

سہیل آفریدی نے پنجاب پولیس کی سیکیورٹی لینے سے واضح انکار کرتے ہوئے الزام عائد کیا کہ پولیس نے میلاد کی تیاریاں کرنے والے پی ٹی آئی کے کارکن اشتیاق احمد کو ناحق شہید کیا۔ بعد ازاں وزیراعلیٰ خیبرپختونخوا جاں بحق کارکن اشتیاق احمد کی رہائش گاہ چمڑا منڈی پہنچے اور لواحقین سے دلی تعزیت کا اظہار کیا۔ ان کی آمد سے قبل پولیس کی بھاری نفری نے علاقے میں پہنچ کر قریبی دکانیں بند کروائیں، جبکہ ضلعی انتظامیہ کا کہنا ہے کہ شہر میں امن و امان کے قیام کے لیے دفعہ 144 پر سختی سے عمل درآمد کرایا جائے گا۔