امریکیوں نے ایک دہشتگرد انتظامیہ قائم کر رکھی ہے: ایرانی صدر

ایرانی صدر مسعود پزشکیان نے شدید الفاظ میں واشنگٹن کی پالیسیوں کی مذمت کرتے ہوئے کہا ہے کہ امریکہ نے دنیا بھر میں ایک “دہشت گرد انتظامیہ” قائم کر رکھی ہے۔ تہران میں خطاب کرتے ہوئے ایرانی صدر نے امریکی رویے پر سخت تنقید کی اور کہا کہ امریکی انتظامیہ عالمی سطح پر جہاں چاہتی ہے اپنے مخالفین کو قتل کر دیتی ہے۔ انہوں نے مغرب اور امریکی انسانی حقوق کے دعووں کو منافقت پر مبنی قرار دیتے ہوئے سوال اٹھایا کہ اگر انسانی حقوق کے یہ علمبردار واقعی مخلص ہیں تو پھر معصوم بچوں اور ہسپتالوں کو بمباری کا نشانہ کیوں بنایا جاتا ہے؟

مسعود پزشکیان نے امریکی قیادت کو چیلنج دیتے ہوئے کہا کہ اگر ان میں واقعی میدانِ جنگ کا حوصلہ ہے تو سامنے آ کر مقابلہ کریں، جدید ٹیکنالوجی کا سہارا لے کر بے گناہ شہریوں کو بے گھر، محروم اور قتل کرنے سے عسکری توازن قائم نہیں ہوتا۔ انہوں نے مزید کہا کہ امریکہ بین الاقوامی راستے بند کرتا ہے اور ظالمانہ اقتصادی پابندیاں عائد کرتا ہے، جن کا براہِ راست خمیازہ غریب عوام کو بھگتنا پڑتا ہے۔ ایرانی صدر کا کہنا تھا کہ محبِ وطن ہونے کا پرچار کرنے والے عناصر درحقیقت دنیا بھر میں عدم استحکام اور برے اقدامات کو ہوا دے رہے ہیں۔