ایران کی تکنیکی اور معاشی مدد: امریکا کی روسی بینک پر پابندیاں عائد

امریکہ نے ایران کے جوہری اور عسکری پروگراموں کے لیے تکنیکی، مادی اور معاشی معاونت فراہم کرنے والے عالمی عناصر کے خلاف کارروائیاں مزید تیز کرنے کا اعلان کر دیا ہے۔ امریکی وزیرِ خزانہ سکاٹ بیسنٹ نے واشنگٹن میں میڈیا کو بریفنگ دیتے ہوئے بتایا کہ ‘آپریشن اکنامک آؤٹ کاسٹ’ کے تحت روس کے معروف ‘وی ٹی بی بینک’ (VTB Bank) پر سخت اقتصادی پابندیاں عائد کر دی گئی ہیں۔ انہوں نے الزام عائد کیا کہ اس روسی بینک نے تہران کو بین الاقوامی معاشی پابندیوں کے اثرات سے بچانے اور مالیاتی گٹھ جوڑ برقرار رکھنے میں کلیدی کردار ادا کیا۔

سکاٹ بیسنٹ کا کہنا تھا کہ ٹرمپ انتظامیہ ان تمام عالمی افراد اور اداروں کو مالی طور پر مفلوج کرنے کی پالیسی پر گامزن رہے گی جو ایرانی حکومت کو کسی بھی قسم کا فنڈ، ٹیکنالوجی یا سہولت فراہم کر رہے ہیں۔ انہوں نے واضح کیا کہ اس امریکی قدم کا بنیادی مقصد ماسکو اور تہران کے درمیان قائم غیر قانونی مالیاتی نیٹ ورک کو توڑنا اور ایران پر عائد عالمی اقتصادی پابندیوں پر سختی سے عمل درآمد یقینی بنانا ہے تا کہ تہران کی مالی صلاحیتوں کو محدود کیا جا سکے۔