چیف الیکشن کمشنر کی تقرری، حکومت اور حزب اختلاف میں مشاورت کا آغاز

اسلام آباد: چیف الیکشن کمشنر اور الیکشن کمیشن کے دو اراکین کی نئی تقرری کے اہم آئینی معاملے پر حکومت اور اپوزیشن کے مابین باضابطہ مشاورت کا آغاز ہو گیا ہے۔

اسی سلسلے میں قائدِ حزبِ اختلاف راجہ ناصر عباس کے چیمبر میں اپوزیشن جماعتوں کا ایک اہم اور اعلیٰ سطحی اجلاس منعقد ہوا، جس کی صدارت محمود خان اچکزئی نے کی۔ اجلاس میں پاکستان تحریکِ انصاف (پی ٹی آئی) کے چیئرمین بیرسٹر گوہر، سلمان اکرم راجہ اور دیگر مرکزی رہنماؤں نے شرکت کی۔

 ذرائع کے مطابق اپوزیشن رہنماؤں سے تفصیلی تفہیم کے بعد قائدِ حزبِ اختلاف نے چیف الیکشن کمشنر کی تقرری سے متعلق وزیرِ اعظم کے خط کا جواب بھیج دیا ہے اور باہم مشاورت کے لیے دن اور وقت طے کرنے کی درخواست کی ہے۔ اجلاس میں 27 ستمبر کو ہونے والے احتجاجی مارچ کے حوالے سے حکمتِ عملی پر تفصیلی تبادلہ خیال کیا گیا اور پی ٹی آئی قیادت کو اس احتجاج کے لیے ملک گیر سطح پر بھرپور تیاریوں کی ہدایت کی گئی۔ ملک کی مجموعی سیاسی و معاشی صورتِ حال پر تشویش کا اظہار کرتے ہوئے تمام اپوزیشن جماعتوں کو ایک پلیٹ فارم پر اکٹھا کرنے کے لیے آل پارٹیز کانفرنس بلانے کا فیصلہ کیا گیا۔ اے پی سی کی تیاریوں اور حتمی خدوخال کا جائزہ لینے کے لیے 15 ستمبر کو ‘تحریکِ تحفظِ آئین’ کا اہم اجلاس طلب کر لیا گیا ہے۔