ایم کیو ایم نے نیا ڈرامہ شروع کر رکھا، سندھودیش اس وقت موضوع ہی نہیں: سعید غنی

صوبائی وزیر سعید غنی نے متحدہ قومی موومنٹ (ایم کیو ایم) کو شدید تنقید کا نشانہ بناتے ہوئے کہا ہے کہ ایم کیو ایم نے سیاست میں ایک نیا ڈرامہ شروع کر رکھا ہے، جبکہ حقیقت میں ’سندھودیش‘ اس وقت کوئی موضوع ہی نہیں ہے۔ کراچی میں میڈیا سے گفتگو کرتے ہوئے سعید غنی نے واضح کیا کہ سندھ میں علیحدگی پسندوں اور قوم پرستوں کے راستے میں سب سے بڑی رکاوٹ پاکستان پیپلز پارٹی (پی پی پی) ہے، جبکہ ماضی میں اگر کسی سیاسی جماعت کے سندھودیش کے حامیوں اور رہنماؤں سے تعلقات رہے ہیں تو وہ خود ایم کیو ایم ہی ہے۔

سعید غنی نے ایم کیو ایم کے دعوؤں کو رد کرتے ہوئے کہا کہ جس تنظیم کی کوئی سیاسی حیثیت نہیں اس پر بات کرنا ہی فضول ہے، ایم کیو ایم کی موجودہ سیاسی حیثیت زیرو ہے اور انہیں محض سیٹیں جتوا کر اسمبلیوں میں بھیجا گیا ہے۔ انہوں نے ماضی کے واقعات کا حوالہ دیتے ہوئے کہا کہ مصطفیٰ کمال نے خود خالد مقبول صدیقی پر بھارتی پاسپورٹ استعمال کرنے اور ‘را’ (RAW) سے تعلقات کا الزام لگایا تھا، اور آج وہی لوگ دوسروں کو نصائح کر رہے ہیں۔ انہوں نے مطالبہ کیا کہ مصطفیٰ کمال کے ان پرانے بیانات کو اسمبلی کے فلور پر چلایا جانا چاہیے۔