آئی ٹی برآمدات میں اضافہ؛ پاکستانی ٹیک سیکٹر کی عالمی منڈیوں تک رسائی

اسلام آباد: پاکستان کا آئی ٹی اور آئی سی ٹی شعبہ عالمی منڈیوں میں تیزی سے ابھر رہا ہے، جہاں مالی سال 26-2025 کے دوران آئی سی ٹی برآمدی ترسیلات میں سالانہ 19.7 فیصد کا نمایاں اضافہ ریکارڈ کیا گیا ہے۔

سرکاری ارقام و شمار کے مطابق پاکستان کے آئی ٹی شعبے نے 2.91 ارب ڈالر کا تاریخی تجارتی سرپلس حاصل کر کے ملکی معاشی استحکام میں اہم کردار ادا کیا ہے۔ اس تیز رفتار ڈیجیٹل نمو کے نتیجے میں سیکیورٹیز اینڈ ایکسچینج کمیشن آف پاکستان (SECP) کے پاس آئی ٹی اور آئی ٹی سروسز سے متعلق 872 نئی کمپنیاں رجسٹر ہوئی ہیں۔ حال ہی میں 20 سے زائد پاکستانی ٹیک کمپنیوں، ڈیجیٹل ایجنسیوں اور ای کامرس اداروں نے سعودی عرب میں منعقدہ بین الاقوامی نمائش میں شرکت کر کے عالمی سطح پر اپنی خدمات کو متعارف کرایا۔

خصوصی سرمایہ کاری سہولت کونسل (SIFC) پاکستان کی ڈیجیٹل معیشت، آئی ٹی انفراسٹرکچر اور غیر ملکی سرمایہ کاری کے فروغ کے لیے کلیدی کردار ادا کر رہی ہے۔ جدید مالیاتی اصلاحات اور بین الاقوامی ادائیگیوں کے نظام میں بہتری کے باعث پاکستانی کمپنیوں کے لیے عالمی کرنسیوں میں رقم وصول کرنا اور فنڈز کا انتظام آسان ہو گیا ہے، جس سے ملکی ٹیک سیکٹر کو مضبوط بنیادیں فراہم ہو رہی ہیں۔