بھارت کے یکطرفہ اقدامات جنوبی ایشیا میں امن و سلامتی کیلئے سنگین خطرہ ہیں: رضوان سعید

امریکا میں پاکستان کے سفیر رضوان سعید شیخ نے ایک امریکی میگزین میں بھارتی سفیر کے مضمون کا مدلل جواب دیتے ہوئے بھارت پر زور دیا ہے کہ وہ 6 عشروں سے قائم سندھ طاس معاہدے کا احترام اور اس پر مکمل عمل کرے۔ انہوں نے واضح کیا کہ ستمبر 1960 میں طے پانے والا یہ معاہدہ کوئی بھارتی فیاضی نہیں بلکہ ایک دہائی کے طویل مذاکرات کا قانونی نتیجہ تھا، جس کی پاسداری دونوں فریقین پر لازم ہے۔ سفیر پاکستان نے بھارت کے اس موقف کو مسترد کیا کہ معاہدہ ناانصافی پر مبنی تھا یا پاکستان ہائیڈرو پاور منصوبوں میں رکاوٹ ڈال رہا ہے۔ انہوں نے دوٹوک خبردار کیا کہ دہشت گردی یا دیگر سیاسی الزامات کا سہارا لے کر کوئی ریاست اپنے عالمی معاہدات سے بری الذمہ نہیں ہو سکتی اور سندھ طاس معاہدے میں ایسی کوئی شق نہیں جو کسی ملک کو اسے یکطرفہ طور پر منسوخ کرنے کا حق دیتی ہو۔ پاکستان نے بھارت کو تمام تر تنازعات طے شدہ میکانزم کے ذریعے مذاکرات کے ساتھ حل کرنے کا مشورہ دیا ہے