افغانستان میں آزادی پسندوں کی کارروائیاں تیز، قندھار اور ہلمند میں طالبان نشانے پر

افغانستان میں طالبان حکومت کے مکمل سیکیورٹی اور انتظامی کنٹرول کے دعوؤں کے برعکس ملک بھر میں مخالف مسلح تنظیموں کی پیش قدمی اور کارروائیوں میں نمایاں اضافہ دیکھا جا رہا ہے۔ افغان طالبان کے خلاف سرگرم مسلح تنظیم ‘افغانستان یونائیٹڈ فرنٹ’ (AUF) کی جانب سے قندھار اور ہلمند کے علاقوں میں مسلسل کارروائیوں کا دعویٰ کیا گیا ہے، جس سے ملک میں امن و امان کی مجموعی صورتحال پر شدید سوالات اٹھ رہے ہیں۔

افغانستان یونائیٹڈ فرنٹ کی جانب سے جاری کردہ تفصیلات کے مطابق قندھار کے ضلع ڈنڈ میں ایک حملے کے دوران طالبان کا اہم کمانڈر عزت اللہ ہلاک ہو گیا، جبکہ ضلع ارغنداب میں کی گئی ایک اور ٹارگٹڈ کارروائی کے نتیجے میں طالبان انٹیلی جنس کا ایک اہلکار مارا گیا۔ اس کے علاوہ صوبہ ہلمند کی مرکزی جیل پر کیے گئے ایک دستی بم حملے میں بھی طالبان کا ایک سیکیورٹی اہلکار ہلاک اور 2 افراد زخمی ہو گئے۔ تجزیہ کاروں اور افغان امور کے ماہرین کے مطابق طالبان کی سخت پالیسیوں اور مخالف گروپوں کے خلاف کارروائیوں کے بعد ملک میں خودمختار مسلح تحریکوں کا ابھرنا عوامی بے چینی اور طالبان حکومت کے لیے بڑھتے ہوئے سیکیورٹی چیلنجز کی نشاندہی کرتا ہے۔