لبنان میں اقوام متحدہ کی عبوری امن فوج کی چوکی پر فائرنگ

جنوبی لبنان میں اسرائیل اور لبنان کی سرحد کے قریب واقع ‘کفرا شوبا’ کے علاقے میں اقوامِ متحدہ کی عبوری امن فوج (UNIFIL) کی چوکی پر نامعلوم افراد کی جانب سے ہلکے ہتھیاروں سے متعدد بار براہِ راست فائرنگ کی گئی ہے۔ یونیفل حکام کے مطابق اس واقعے میں خوش قسمتی سے کوئی جانی نقصان نہیں ہوا، تاہم امن اہلکاروں کی چوکیاں شدید خطرے کی زد میں آ گئی ہیں۔

اقوامِ متحدہ کی امن فوج نے اس حملے کی شدید مذمت کرتے ہوئے اسے مکمل طور پر ناقابلِ قبول اور امن اہلکاروں کی زندگیوں کے لیے سنگین خطرہ قرار دیا ہے، جبکہ واقعے کی باضابطہ تحقیقات شروع کر دی گئی ہیں۔ واضح رہے کہ اس مشن کے تحت 50 ممالک سے تعلق رکھنے والے ساڑھے 7 ہزار امن اہلکار جنوبی لبنان میں تعینات ہیں۔ اقوامِ متحدہ کی سلامتی کونسل پہلے ہی فورس کے مینڈیٹ کو دسمبر میں ختم کرنے کا فیصلہ کر چکی ہے، جس پر لبنانی وزیراعظم نواف سلام نے خبردار کیا ہے کہ فورسز کے اچانک انخلا سے پیدا ہونے والے امن و امان کے خلا کو پر کرنے کے لیے متبادل انتظامات کا قیام انتہائی ضروری ہے