روسی صدر پیوٹن نے امریکا سے کشیدگی کم کرنے کیلئے ایران کو معاونت کی پیشکش کر دی

روس کے صدر ولادی میر پیوٹن نے امریکی اور مغربی دباؤ و کشیدگی میں کمی کے لیے ایرانی ہم منصب مسعود پزشکیان سے ٹیلی فونک رابطے کے دوران ثالثی اور تکنیکی معاونت کی پیشکش کر دی ہے۔ دونوں رہنماؤں کے درمیان ہونے والے رابطہ میں دوطرفہ تعلقات کا جائزہ لیا گیا، جس کے دوران صدر پیوٹن نے جامع اسٹریٹیجک شراکت داری معاہدے کے تحت ایران کے ساتھ ہر ممکن تعاون جاری رکھنے کے عزم کو دہرایا۔

روسی صدر پیوٹن نے امریکی اور مغربی اثر و رسوخ اور جارحیت کے خلاف ایرانی قوم کی ثابت قدمی کو تاریخی لمحہ قرار دیتے ہوئے سراہا اور کہا کہ روس خطے کے تمام تنازعات کا پائیدار سفارتی حل چاہتا ہے اور اس مقصد کے لیے تعمیری کردار ادا کرنے کے لیے تیار ہے۔ دوسری جانب، ایرانی صدر مسعود پزشکیان نے کابینہ اجلاس سے خطاب کرتے ہوئے واضح کیا کہ ایران اس وقت ہمہ گیر جنگ کا سامنا کر رہا ہے، تاہم ملک اپنے آئینی و قومی حقوق کے تحفظ کے لیے سفارتی مذاکرات اور مزاحمت کی دوہری حکمتِ عملی پر کاربند رہے گا اور داخلی یکجہتی و خود انحصاری کے ذریعے دشمن کو مایوس کرے گا۔