خیبرپختونخوا میں گورنر راج نہیں نالائق حکومت مسلط ہے: فیصل کریم کنڈی

گورنر خیبر پختونخوا فیصل کریم کنڈی نے صوبائی حکومت پر شدید تنقید کرتے ہوئے کہا ہے کہ خیبر پختونخوا میں اس وقت گورنر راج نہیں بلکہ ایک نالائق حکومت مسلط ہے۔ بی بی سی کو دیے گئے ایک انٹرویو میں انہوں نے کہا کہ اگر صدرِ مملکت، وزیراعظم اور متعلقہ ادارے یہ سمجھتے ہیں کہ صوبے کو بچانے کے لیے ایمرجنسی یا گورنر راج ضروری ہے، تو آئین کے آرٹیکل 232 اور 234 کے تحت یہ اقدام کیا جا سکتا ہے۔

فیصل کریم کنڈی نے واضح کیا کہ انہیں پُرامن احتجاج پر کوئی اعتراض نہیں لیکن احتجاج کے نام پر انتشار اور بدامنی پھیلانے کی اجازت نہیں دی جائے گی۔ صوبائی حکومت کی جانب سے گورنر کی جانب سے امن و امان پر بلائے گئے اجلاس کو غیر آئینی قرار دینے کے مؤقف کو مسترد کرتے ہوئے انہوں نے کہا کہ وہ اپنے آئینی اختیارات سے پوری طرح واقف ہیں، اور آئین کے تحت گورنر امن و امان کی صورتحال پر اجلاس بلا سکتا ہے۔ انہوں نے وضاحت کی کہ انہوں نے نہ آئی جی کو کسی کی ٹرانسفر پوسٹنگ کا کہا اور نہ ہی چیف سیکرٹری سے فنڈز مانگے، اجلاس کا مقصد صرف صوبے کی مجموعی صورتحال کا جائزہ لینا تھا۔