حوثیوں کے سعودی ایئرپورٹس پر حملوں کی دھمکیاں، امریکی شہریوں کو محتاط رہنے کی ہدایت

امریکی محکمہ خارجہ کے بیورو آف قونصلر افیئرز نے خطے میں بڑھتی ہوئی کشیدگی اور حوثی ملیشیا کی جانب سے سعودی عرب کی فضائی حدود اور ہوائی اڈوں کو نشانہ بنانے کی دھمکیوں کے بعد مملکت میں مقیم اپنے شہریوں کے لیے ایک نیا سیکیورٹی الرٹ جاری کیا ہے۔

سماجی رابطے کی ویب سائٹ ایکس (سابق ٹوئٹر) پر جاری کردہ اہم بیان میں امریکی محکمہ خارجہ نے یاد دہانی کرائی کہ حوثی باغی ماضی میں بھی سعودی عرب کے شہری ہوائی اڈوں اور بنیادی ڈھانچے پر حملے کر چکے ہیں۔ بیان میں خبردار کیا گیا ہے کہ موجودہ ملٹری تنازع اور سیکیورٹی کی بدلتی صورتحال کے باعث فلائٹ آپریشنز منسوخ ہو سکتے ہیں، فضائی حدود عارضی طور پر بند ہو سکتی ہے اور سفری سفری دشواریاں پیش آ سکتی ہیں۔ امریکی حکومت نے تمام امریکی شہریوں کو ہدایت کی ہے کہ وہ سفر سے قبل اپنی متعلقہ ایئرلائن اور ایئرپورٹ انتظامیہ سے پروازوں کی تازہ ترین صورتحال کی تصدیق کریں اور الرٹ رہیں۔