پاکستان اور ہانگ کانگ کے درمیان ڈیجیٹل فنانس، ٹیکنالوجی تعاون بڑھانے پر پیش رفت

وزیر مملکت و چیئرمین پاکستان ورچوئل ایٹموسفیرک اینڈ ویب 3 ایجنسی (پیوارا) بلال بن ثاقب نے ہانگ کانگ کے اپنے اہم دورے کے دوران اعلیٰ حکام سے ملاقاتیں کی ہیں، جس کے نتیجے میں پاکستان اور ہانگ کانگ کے درمیان ڈیجیٹل فنانس، فن ٹیک اور ورچوئل اثاثوں میں تعاون بڑھانے پر پیش رفت ہوئی ہے۔ بلال بن ثاقب نے ہانگ کانگ مانیٹری اتھارٹی کے ڈپٹی چیف ایگزیکٹو آرتھر یوئن، سیکرٹری فنانشل سروسز کرسٹوفر ہوئی اور قانون ساز کونسل کے رکن ڈنکن چیو سے جداگانہ ملاقاتیں کیں۔ انہوں نے واضح کیا کہ پاکستان نے ورچوئل اثاثوں اور فن ٹیک کے لیے ریگولیٹری بنیادیں قائم کر دی ہیں اور اب ملک کا مقصد بین الاقوامی سرمایہ کاروں کو راغب کرنا نیز سرکاری سکیورٹیز، صکوک اور دیگر اثاثوں کی ٹوکنائزیشن کے لیے ہانگ کانگ ماڈل سے استفادہ کرنا ہے۔ ان ملاقاتوں میں ویب تھری، مصنوعی ذہانت (AI) اور سائبر سکیورٹی میں مشترکہ اقدامات اور شفاف ورچوئل اثاثہ ایکو سسٹم کے قیام پر بھی اتفاق کیا گیا