ٹرین کے بیت الخلا میں بہہ جانے والی قیمتی انگوٹھی خاتون کو واپس مل گئی

امریکی ریاست نیو جرسی میں ایک عجیب و غریب واقعہ پیش آیا جہاں این جے ٹرانزٹ (NJ Transit) کی ٹرین کے بیت الخلا میں غلطی سے فلش ہو جانے والی انتہائی قیمتی اور جذباتی اہمیت کی حامل انگوٹھی عملے نے محنت کے بعد تلاش کر کے خاتون کے حوالے کر دی۔ متاثرہ خاتون جولی اینجلیکولا کے مطابق وہ ٹرین کا بیت الخلا استعمال کرنے کے بعد اپنی نشست پر آئیں تو انہیں اندازہ ہوا کہ ان کی شادی کی انگوٹھی انگلی میں موجود نہیں ہے۔ انہوں نے بتایا کہ ہاتھوں کو صاف کرنے کے دوران جلد بازی میں انگوٹھی ٹوائلٹ پیپر کے ساتھ فلش ہو گئی تھی۔

واقعے کی اطلاع ملتے ہی این جے ٹرانزٹ انتظامیہ نے فوری ایکشن لیتے ہوئے ٹرین کو سروس سے ہٹا دیا۔ تکنیکی عملے نے ٹرین کو جیکس کی مدد سے اوپر اٹھایا اور بیت الخلا کا ویسٹ ٹینک نکال کر کھولا، جہاں انگوٹھی محفوظ حالت میں مل گئی۔ 1905 کی یہ نایاب انگوٹھی ایک قدیم اشیاء کی دکان سے خریدی گئی تھی جس پر کندہ ابتدائی حروف خاتون اور ان کے شوہر کے عرفی نام سے ملتے ہیں۔ این جے ٹرانزٹ کے کسٹمر سروس سینٹر میں انگوٹھی واپس ملنے پر خاتون نے انتظامیہ کا شکریہ ادا کیا۔