شاہ رخ خان کے گھر سے سانپ نکل آئے

بالی ووڈ کے سپر اسٹار شاہ رخ خان کی ممبئی میں واقع مشہور زمانہ رہائش گاہ “منّت” کے لان سے دو سانپ نکل آنے کے واقعے نے سوشل میڈیا اور میڈیا پر ہلچل مچا دی ہے۔

بھارتی میڈیا رپورٹس کے مطابق سمندر کے بالکل سامنے واقع شاہ رخ خان کے بنگلے ‘منّت’ کے لان میں اچانک دو سانپ دیکھے گئے، جس سے وہاں موجود عملے میں تشویش پھیل گئی۔ اطلاع ملتے ہی سانپ پکڑنے والے ماہرین کو بلایا گیا، جنہوں نے فوری کارروائی کرتے ہوئے ایک سیڑھی کے نیچے سے تقریباً 8 فٹ لمبا سانپ بحفاظت ریسکیو کر لیا، جبکہ جلد ہی دوسرے سانپ کو بھی پکڑ کر محفوظ مقام پر منتقل کر دیا گیا۔

واضح رہے کہ شاہ رخ خان کی رہائش گاہ ‘منّت’ ممبئی کے اہم اور مشہو ترین مقامات میں شمار کی جاتی ہے، جہاں ان کے مداحوں کا روزانہ کی بنیاد پر اپنے پسندیدہ ستارے کی ایک جھلک دیکھنے کے لیے تانتا بندھا رہتا ہے۔