حکومت کا ملکی پرائیویٹ ایکویٹی نظام مضبوط بنانے، طویل مدتی سرمایہ کاری کے فروغ کا فیصلہ

وزیرِ خزانہ سینیٹر محمد اورنگزیب کی زیرِ صدارت نیشنل پرائیویٹ ایکویٹی پالیسی فریم ورک کی تیاری کے لیے قائم کردہ کمیٹی کا پہلا اجلاس منعقد ہوا۔ اجلاس کے دوران ملکی پرائیویٹ ایکویٹی نظام کو مضبوط بنانے اور پائیدار معاشی نمو کے لیے طویل المدتی سرمایہ کاری کے فروغ کے عزم کا اعادہ کیا گیا۔

وزیرِ خزانہ نے گفتگو کرتے ہوئے واضح کیا کہ پرائیویٹ ایکویٹی پالیسی فریم ورک نجی شعبے کی قیادت میں تیار کیا جائے گا، جبکہ حکومت کا کردار براہِ راست فنڈنگ کے بجائے صرف سازگار ماحول اور واضح ریگولیٹری فریم ورک کی فراہمی تک محدود رہے گا۔ اجلاس میں مقامی و غیر ملکی سرمایہ کاروں کی شمولیت، ٹیکس اور پالیسی رکاوٹوں کے خاتمے، اور انضمام و نجکاری میں پرائیویٹ ایکویٹی کے کردار کا جائزہ لیا گیا۔ پالیسی سفارشات کو حتمی شکل دینے کے لیے ٹیکسیشن، ریگولیٹری فریم ورک، کاروباری حکمتِ عملی اور قابلِ عمل منصوبوں پر مشتمل چار ورکنگ گروپس قائم کر دیے گئے ہیں، جن کی تیار کردہ سفارشات حتمی منظوری کے لیے وزیراعظم کو پیش کی جائیں گی۔