پاکستان نے امریکہ سے 10 ارب ڈالر کی ایکسچینج سٹیبلائزیشن فسیلیٹی مانگ لی

وفاقی وزیر خزانہ سینیٹر محمد اورنگزیب نے تصدیق کی ہے کہ پاکستان نے معاشی استحکام کے لیے امریکہ سے 10 ارب ڈالر کی ایکسچینج سٹیبلائزیشن فسیلیٹی (Exchange Stabilization Facility) کی باقاعدہ درخواست کی ہے۔ اسلام آباد میں میڈیا سے غیر رسمی گفتگو کرتے ہوئے انہوں نے بتایا کہ پاکستان کی یہ درخواست اس وقت امریکی محکمہ خزانہ کے زیر غور ہے، جس پر ستمبر تک حتمی فیصلہ متوقع ہے۔

وزیر خزانہ کا کہنا تھا کہ حکومت پاکستان دوطرفہ قرضوں کی واپسی کی مدت میں 10 سال تک توسيع کے لیے مختلف آپشنز پر کام کر رہی ہے۔ انہوں نے مزید واضح کیا کہ معاشی اصلاحات اور مالیاتی مدد کے سلسلے میں امریکی ایگزم بینک (EXIM Bank)، یو ایس ڈی ایف سی (DFC) اور دیگر بین الاقوامی اداروں کے ساتھ بھی بات چیت کا عمل جاری ہے۔