مبینہ زیادتی کیس: رجب بٹ سمیت پانچ ملزمان پر فرد جرم 29 اگست کو عائد ہوگی

لاہور کی سیشن کورٹ میں ٹک ٹاکر عائشہ جٹ سے مبینہ زیادتی کے مقدمے میں نامزد یوٹیوبر رجب بٹ سمیت پانچ ملزمان کے خلاف دائر استغاثہ پر سماعت ہوئی۔ کیس کی سماعت ایڈیشنل سیشن جج ظفر یاب چدھڑ نے کی۔

سماعت کے دوران ملزم سلیمان حیدر کے وکیل کی عدم پیشی کے باعث عدالت ملزمان پر فردِ جرم عائد نہ کر سکی۔ عدالت نے معاملے کا سخت نوٹس لیتے ہوئے رجب بٹ، عبدالرحمن، جواد، جہانگیر اور سلیمان حیدر پر فردِ جرم عائد کرنے کے لیے 29 اگست کی تاریخ مقرر کر دی ہے۔

سماعت کے موقع پر رجب بٹ سمیت تمام پانچوں ملزمان عدالت میں پیش ہوئے اور اپنی حاضری مکمل کروائی، جبکہ ملزمان کی جانب سے وکیل میاں علی اشفاق عدالت کے روبرو پیش ہوئے۔ عدالت نے آئندہ سماعت پر تمام ملزمان اور ان کے وکلا کو ہر صورت حاضری یقینی بنانے کا حکم دیا ہے۔

واضح رہے کہ نواب ٹاؤن پولیس نے ابتداء میں تفتیش کے دوران تمام ملزمان کو گناہ گار قرار دیا تھا، تاہم بعد میں پولیس کی جانب سے ملزمان کو بے گناہ قرار دینے پر متاثرہ ٹک ٹاکر عائشہ جٹ نے پولیس رپورٹ کو چیلنج کرتے ہوئے سیشن کورٹ میں براہِ راست استغاثہ دائر کیا تھا۔