آزاد کشمیر کی مخصوص نشستیں، نواز شریف نے خواتین امیدواروں کے انٹرویوز مکمل کرلئے

پاکستان مسلم لیگ (ن) کے قائد محمد نواز شریف نے مری میں آزاد جموں و کشمیر قانون ساز اسمبلی کی مخصوص نشستوں پر پارٹی ٹکٹ کی خواہشمند خواتین امیدواروں کے انٹرویوز کیے۔ انٹرویوز کے دوران نواز شریف نے امیدواروں کے سیاسی پس منظر، پارٹی خدمات اور عوامی مسائل کے حل سے متعلق تجاویز کا جائزہ لیا۔ اس موقع پر آزاد کشمیر اسمبلی کی 8 مخصوص نشستوں، جن میں 5 خواتین، 1 علما و مشائخ، 1 ٹیکنوکریٹ اور 1 تارکین وطن کے لیے مخصوص نشست شامل ہے، پر نامزدگیوں سے متعلق اہم مشاورت بھی کی گئی۔

حالیہ آزاد کشمیر عام انتخابات میں مسلم لیگ (ن) 45 براہِ راست نشستوں میں سے 25 حاصل کر کے سب سے بڑی پارلیمانی جماعت بن کر ابھری ہے جبکہ پاکستان پیپلز پارٹی نے 12 نشستیں حاصل کی ہیں۔ مخصوص نشستوں پر حتمی نامزدگیوں کا اعلان مشاورتی عمل مکمل ہونے کے بعد کیا جائے گا۔ انٹرویوز کے وقت وزیراعلیٰ پنجاب مریم نواز شریف، ن لیگ آزاد کشمیر کے صدر شاہ غلام قادر، انوشہ رحمان اور رانا ثناء اللہ بھی موجود تھے۔