فضا علی کی اداکارہ نمرہ خان کے شوہر پر کڑی تنقید

پاکستانی اداکارہ، میزبان اور ماڈل فضا علی نے اداکارہ نمرہ خان کے ساتھ پیش آنے والے حالیہ معاملے پر نمرہ کی بھرپور حمایت کرتے ہوئے ان کے شوہر کو سخت تنقید کا نشانہ بنایا ہے۔ نمرہ خان کی دوسری شادی کے کچھ ہی عرصے بعد دونوں کے درمیان شدید اختلافات پیدا ہو گئے تھے، جس کے بعد مبینہ طور پر سوشل میڈیا پر ایک دوسرے کے خلاف پوسٹس کا سلسلہ شروع ہوا اور نمرہ کے شوہر نے ’Good Riddance‘ کا جملہ بھی استعمال کیا۔

اس افسوسناک صورتحال پر فضا علی نے نمرہ خان سے کھل کر اظہارِ یکجہتی کرتے ہوئے کہا کہ رشتے ختم ہونا اور راستے الگ ہونا زندگی کا حصہ ہے، لیکن اس کا مطلب ہرگز یہ نہیں کہ انسان اس عورت کی عزت اور وقار کو پامال کرے۔ انہوں نے کہا کہ ایک ایسے شخص کا یہ رویہ سمجھ سے بالاتر ہے جس نے کچھ عرصہ قبل ہی نمرہ کو اپنی شریکِ حیات بنایا تھا۔ فضا علی نے نمرہ کو حوصلہ دیتے ہوئے کہا: “نمرہ! اپنا سر ہمیشہ بلند رکھنا، کسی ایک کے زندگی سے چلے جانے سے تمہاری اہمیت اور قدر کم نہیں ہو جاتی۔” اس معاملے پر سوشل میڈیا صارفین کی جانب سے بھی فضا علی کے مؤقف کو سراہا جا رہا ہے اور ملا جلا ردعمل دیکھنے میں آ رہا ہے۔