نمرہ خان کی ازدواجی زندگی سے متعلق افواہوں پر ساتھی فنکارائیں حمایت میں آگئیں

پاکستانی شوبز انڈسٹری کی معروف اداکارہ نمرہ خان کی ازدواجی زندگی سے متعلق سوشل میڈیا پر گردش کرنے والی افواہوں کے بعد ان کی ساتھی فنکارائیں کھل کر ان کی حمایت میں میدان میں آ گئی ہیں۔ سینئر اور معروف اداکاراؤں نے نمرہ خان کا ساتھ دیتے ہوئے ناقدین کو سخت تنقید کا نشانہ بنایا ہے اور عوام سے ہمدردی کا مظاہرہ کرنے کی اپیل کی ہے۔

اداکارہ منشا پاشا نے نمرہ خان کے شوہر زین حامد کی ایک مبہم سوشل میڈیا پوسٹ پر سخت ردعمل کا اظہار کرتے ہوئے کہا ہے کہ زین جیسے معمولی اور کم ظرف مردوں کی اس طرح کی حرکات ہمیشہ سے ایک پیچیدہ اور افسوسناک مسئلہ رہی ہیں۔ منشا پاشا کے اس جرات مندانہ بیان کے بعد سوشل میڈیا پر یہ معاملہ مزید توجہ کا مرکز بن گیا، جبکہ اس سے قبل معروف مارننگ شو کی میزبان ندا یاسر نے بھی نمرہ خان سے اظہارِ یکجہتی کے لیے ایک پوسٹ شیئر کی تھی۔ دوسری جانب اداکارہ مومل خالد نے بھی نمرہ خان کی حمایت کرتے ہوئے کہا کہ وہ جس مشکل صورتحال سے گزر رہی ہیں، اس پر ان کا دل بے حد گرفتہ ہے۔ مومل خالد نے اداکارہ کو بلاوجہ موردِ الزام ٹھہرانے والوں پر تنقید کرتے ہوئے لوگوں سے زور دے کر کہا کہ وہ جلد بازی میں فیصلے سنانے کے بجائے انسانیت اور ہمدردی کا مظاہرہ کریں۔

واضح رہے کہ سوشل میڈیا پر نمرہ خان کی دوسری شادی کے خاتمے کی افواہیں اس وقت زور پکڑ گئیں جب اداکارہ کے انسٹاگرام اکاؤنٹ سے ان کی شادی کی تصاویر اچانک غائب ہو گئیں۔ تاہم، نمرہ خان نے ایک صارف کے سوال کا جواب دیتے ہوئے وضاحت کی تھی کہ انہوں نے تصاویر صرف ‘نظرِ بد’ سے بچنے کے لیے نچلے حصے میں کی ہیں۔ لیکن بعد میں اداکارہ کی جانب سے بھی کچھ مبہم پوسٹس سامنے آئیں جس سے طلاق کی خبروں نے مزید طول پکڑ لیا۔

معاملہ اس وقت اور زیادہ پیچیدہ ہو گیا جب نمرہ خان کے شوہر زین حامد نے اپنے سوشل میڈیا پر “At Peace Finally, Good Riddance” (بالآخر سکون ملا، ایک عذاب سے جان چھوٹی) کے سخت الفاظ پر مشتمل پوسٹ شیئر کی۔ اس پوسٹ نے ان افواہوں کو اور ہوا دی، تاہم اب تک نمرہ خان یا ان کے شوہر کی جانب سے باقاعدہ طلاق یا علیحدگی کی نہ تو کوئی تصدیق کی گئی ہے اور نہ ہی تردید۔