ٹانک میں پیر کو کرفیو نافذ، ضلعی انتظامیہ نے نوٹیفکیشن جاری کر دیا

خیبر پختونخوا کے ضلع ٹانک میں امن و امان کے پیشِ نظر پیر کے روز کرفیو نافذ کرنے کا فیصلہ کیا گیا ہے، جس کا ضلعی انتظامیہ کی جانب سے باقاعدہ نوٹیفکیشن جاری کر دیا گیا ہے۔ جاری کردہ نوٹیفکیشن کے مطابق کرفیو صبح 6 بجے سے شام 6 بجے تک نافذ العمل رہے گا۔ اس 12 گھنٹے کے دوران ضلع کے تمام داخلی و خارجی راستے مکمل طور پر سیل رہیں گے اور ہر قسم کی عمومی آمدورفت پر سخت پابندی عائد ہو گی۔

ضلعی انتظامیہ نے شہریوں کو ہدایت کی ہے کہ وہ کرفیو کے اوقات کے دوران غیر ضروری طور پر گھروں سے باہر نکلنے سے گریز کریں اور جاری کردہ تمام ہدایات پر سختی سے عملدرآمد کریں۔ انتظامیہ نے عوام سے اپیل کی ہے کہ وہ کرفیو کے اوقات کار کو مدِ نظر رکھتے ہوئے اپنی ضروری سرگرمیاں قبل از وقت مکمل کر لیں تاکہ کسی بھی قسم کی دشواری سے بچا جا سکے۔