آئی ایم ایف معاہدہ اور معاشی استحکام بڑی کامیابی؛ سعودی عرب کے خلاف جارحیت کا کوئی جواز نہیں: وزیراعظم شہباز شریف

وزیراعظم محمد شہباز شریف نے وفاقی کابینہ کے اجلاس سے خطاب کرتے ہوئے کہا ہے کہ آئی ایم ایف کے ساتھ اسٹاف لیول معاہدہ طے پا چکا ہے اور نیویارک میں ایم ڈی آئی ایم ایف کے ساتھ ہونے والی ملاقات انتہائی مثبت رہی، جنہوں نے پاکستان کی معاشی استحکام کے لیے کی جانے والی کاوشوں کا اعتراف کیا ہے۔ وزیراعظم نے کہا کہ معاشی ترقی اور چیلنجز پر قابو پانے کے لیے سیاسی و عسکری قيادت نے یکجا ہو کر کام کیا ہے اور سفارتی محاذ پر فیلڈ مارشل سید عاصم منیر سمیت نائب وزیراعظم اسحاق ڈار اور تمام ٹیم کا کردار قابلِ ستائش ہے۔ مشرقِ وسطیٰ کی مجموعی صورتحال پر تشویش کا اظہار کرتے ہوئے انہوں نے کہا کہ سعودی عرب پاکستان کا عزیز ترین برادر ملک ہے اور اس کے خلاف کسی بھی جارحیت کا کوئی جواز نہیں؛ پاکستان اپنے دفاعی معاہدوں کے تحت سعودی عرب کی سلامتی کے لیے مکمل طور پر پرعزم ہے۔ وزیراعظم نے چین اور ایران سے قریبی تعلقات کا اعادہ کرتے ہوئے اسلام آباد میں قائم ہونے والے نئے آئی ٹی پارک کو نوجوانوں کی استعداد کار بڑھانے کے لیے ایک اہم پیش رفت قرار دیا۔