خیبرپختونخوا میں ایمرجنسی نافذ، صدرِ مملکت نے منظوری دے دی

صدرِ مملکت آصف علی زرداری نے وزیراعظم محمد شہباز شریف کی باضابطہ ایڈوائس اور وفاقی کابینہ کی سفارش پر خیبر پختونخوا میں آئینِ پاکستان کے آرٹیکل 232 اور 234 کے تحت ایمرجنسی نافذ کرنے کی منظوری دے دی ہے۔ وفاقی کابینہ کے اہم اجلاس میں صوبے کی بگڑتی ہوئی سیکیورٹی صورتحال اور انسدادِ دہشت گردی کی جنگ سے صوبائی حکومت کی مبینہ عدم توجہی کا تفصیل سے جائز لینے کے بعد صدر مملکت کو سمری ارسال کی گئی تھی۔ وفاقی وزراء محسن نقوی اور طلال چوہدری نے ایوانِ صدر پہنچ کر صدرِ مملکت کو فیصلہ جات سے آگاہ کیا جس کے بعد صدر نے سمری پر دستخط کر دیے ہیں۔ آئینی و سیاسی سطح پر اس حتمی اقدام سے قبل کابینہ نے جے یو آئی (ف) کے سربراہ مولانا فضل الرحمان کے ذریعے سیاسی اتفاقِ رائے اور صوبائی حکومت کو وفاق کا ساتھ دینے پر راغب کرنے کی آخری کوشش بھی کی تھی۔

وفاقی حکومت کی ایڈوائس پر صدرِ مملکت آصف علی زرداری نے آئینِ پاکستان کے آرٹیکل 232(1) اور 234(1) کے تحت خیبر پختونخوا میں ایمرجنسی کے نفاذ کا باضابطہ گزٹ نوٹیفکیشن اور صدارتی فرمان جاری کر دیا ہے، جو کہ فوری طور پر نافذ العمل ہو گیا ہے۔ صدارتی فرمان کے مطابق صوبے میں دہشت گردی کے واقعات میں غیر معمولی اضافے، قانون نافذ کرنے والے اداروں پر حملوں اور صوبائی حکومت کی جانب سے امن و امان برقرار رکھنے میں ناکامی کے پیشِ نظر یہ انتہائی قدم اٹھایا گیا ہے۔ فرمان میں کہا گیا ہے کہ گورنر خیبر پختونخوا کی رپورٹ میں صوبے کے اندر آئینی نظام کی مکمل ناکامی کی نشاندہی کی گئی تھی جس کے بعد صوبے کی صورتحال پاکستان کی مجموعی سلامتی کے لیے خطرہ بن چکی تھی۔ نئے صدارتی احکامات کے تحت وزیراعلیٰ خیبر پختونخوا، صوبائی وزراء، مشیران، معاونینِ خصوصی اور ایڈووکیٹ جنرل فوری طور پر اپنے عہدوں سے سبکدوش ہو گئے ہیں، جبکہ صوبائی اسمبلی کے اختیارات پارلیمان کے سپرد کر دیے گئے ہیں اور گورنر وفاقی حکومت کی ہدایات پر صوبائی انتظامی امور چلائیں گے۔