نئے صوبوں کے لیے اٹھنے والی ہر تحریک کا حصہ بنیں گے: مصطفیٰ کمال

ایم کیو ایم پاکستان کے رہنما اور وفاقی وزیر صحت مصطفیٰ کمال نے اعلان کیا ہے کہ ان کی جماعت ملک میں نئے انتظامی یونٹس اور صوبوں کے قیام کے لیے اٹھنے والی ہر تحریک کا ہراول دستہ بنے گی۔ سرجانی ٹاؤن کراچی میں ایم کیو ایم کے ایک عوامی جلسے سے خطاب کرتے ہوئے انہوں نے کہا کہ پاکستان کی آبادی 24 کروڑ سے تجاوز کر چکی ہے لیکن اتنی بڑی آبادی کے لیے صرف چار صوبے ناکافی ہیں، اس لیے نئے صوبوں کا قیام اب ناگزیر ہو چکا ہے۔ ان کا کہنا تھا کہ ایم کیو ایم نے مقامی حکومتوں کو بااختیار بنانے کا آئینی مسودہ پیش کیا، مگر پیپلز پارٹی نے اس کی مخالفت کی اور 26ویں و 27ویں آئینی ترامیم میں بھی ان کے مطالبات کو شامل نہیں کیا گیا۔

وفاقی وزیر نے تجویز دی کہ ملک میں نئی حد بندیوں کے بجائے موجودہ انتظامی ڈویژنز کو صوبوں کا درجہ دے کر کل 33 صوبے بنائے جائیں، جن میں اسلام آباد بھی شامل ہو۔ انہوں نے واضح کیا کہ وفاق کی جانب سے صوبوں کو دیے جانے والے اربوں روپے چار وزرائے اعلیٰ تک محدود رہتے ہیں جبکہ نچلی سطح پر عوام بنیادی سہولیات جیسے کہ پینے کے صاف پانی سے بھی محروم ہیں۔ مصطفیٰ کمال کا مزید کہنا تھا کہ سندھ کو تقسیم کرنے کے بجائے انتظامی نظام کو درست کرنے کی ضرورت ہے اور بااختیار بلدیاتی و انتظامی یونٹس سے ہی عوام کے مسائل کا حل ممکن ہے۔