جولائی 2026 میں تجارتی خسارہ 3.94 ارب ڈالر تک پہنچ گیا

پاکستان کا تجارتی خسارہ رواں مالی سال 2026-27 کے پہلے مہینے (جولائی) میں 3.94 ارب ڈالر ریکارڈ کیا گیا ہے، جو گزشتہ مالی سال کے اسی ماہ کے مقابلے میں 25 فیصد زیادہ ہے۔

پاکستان بیورو آف سٹیٹسٹکس (ادارہ شماریات) کی جانب سے جاری کردہ اعداد و شمار کے مطابق جولائی 2026 کے دوران قومی برآمدات 2.93 ارب ڈالر جبکہ درآمدات 6.88 ارب ڈالر رہیں، جس کے باعث تجارتی خسارہ 3.94 ارب ڈالر تک پہنچ گیا۔ رپورٹ کے مطابق جولائی 2025 کے مقابلے میں جولائی 2026 کے دوران برآمدات میں 9 فیصد جبکہ درآمدات میں 18 فیصد اضافہ ہوا، جبکہ جون 2026 کے مقابلے میں جولائی 2026 میں برآمدات میں 31 فیصد (تقریباً 70 کروڑ ڈالر) کا نمایاں اضافہ دیکھنے میں آیا۔

ادارہ شماریات کے مطابق جولائی 2025 میں تجارتی خسارہ 3.15 ارب ڈالر تھا، جس میں ایک سال کے دوران تقریباً 79 کروڑ ڈالر کا اضافہ ریکارڈ کیا گیا ہے۔ ان تخمینوں کے لیے امریکی ڈالر کی اوسط قدر 278 روپے شمار کی گئی ہے۔ دستاویزات میں یہ بھی بتایا گیا ہے کہ گزشتہ مالی سال 2025-26 کے دوران خدمات (سروسز) کی برآمدات میں تقریباً 19 فیصد کا مثبت اضافہ دیکھا گیا ہے۔