کوئی طاقت کشمیری عوام کا حقِ خودارادیت ختم نہیں کر سکتی، مشعال ملک

حریت رہنما یاسین ملک کی اہلیہ مشعال ملک نے 05 اگست “یومِ استحصالِ کشمیر” کے موقع پر اپنے جاری کردہ پیغام میں کہا ہے کہ 05 اگست کشمیریوں کی تاریخ کا سیاہ ترین دن ہے، تاہم دنیا کی کوئی بھی طاقت کشمیری عوام کی شناخت اور ان کے حقِ خودارادیت کو ختم نہیں کر سکتی۔ انہوں نے اس عزم کو دہرایا کہ کشمیر کی تحریکِ آزادی اپنی منزل کے حصول تک جاری رہے گی۔ مشعال ملک نے بھارتی جیلوں میں قید حریت قیادت پر ہونے والے مظالم کو تاریخ کا سیاہ باب قرار دیتے ہوئے اقوامِ متحدہ اور عالمی برادری سے مطالبہ کیا کہ مقبوضہ جموں و کشمیر میں انسانی حقوق کی سنگین خلاف ورزیوں کا فوری نوٹس لیا جائے اور سلامتی کونسل کی قراردادوں کے مطابق کشمیریوں کو ان کا بنیادی حقِ خودارادیت دلانے کے لیے مؤثر اقدامات کیے جائیں۔ انہوں نے واضح کیا کہ پاکستان اور دنیا بھر میں مقیم کشمیری مظلوم بہن بھائیوں کے شانہ بشانہ کھڑے ہیں۔