بھارت کے 5 اگست کے اقدامات عالمی قوانین کی صریح خلاف ورزی ہیں: عطا تارڑ

وفاقی وزیر اطلاعات و نشریات عطاء اللہ تارڑ نے ’یومِ استحصالِ کشمیر‘ کے موقع پر اپنے پیغام میں کشمیری عوام کے حقِ خودارادیت کی مکمل حمایت کا اعادہ کرتے ہوئے ۵ اگست ۲۰۱۹ء کے بھارتی اقدام کو عالمی قوانین اور اقوامِ متحدہ کی سلامتی کونسل کی قراردادوں کی صریح خلاف ورزی قرار دیا ہے۔ انہوں نے کہا کہ مقبوضہ جموں و کشمیر میں شدید جبر، محاصرے اور دموگرافک (آبادی کے) تناسب کو تبدیل کرنے کے تمام ہتھکنڈوں کے باوجود بھارت کشمیریوں کے جذبۂ حریت کو تسخیر کرنے میں مکمل ناکام رہا ہے۔ عطاء اللہ تارڑ نے واضح کیا کہ وزیراعظم محمد شہباز شریف کی قیادت میں حکومتِ پاکستان اور ملک کی سیاسی و عسکری قیادت اس معاملے پر ایک ہی صفحے پر ہیں اور تمام عالمی فورمز پر کشمیر کاز کو اجاگر کر رہی ہیں۔ انہوں نے عالمی برادری پر انسانی حقوق کی سنگین پامالیوں کا نوٹس لینے پر زور دیتے ہوئے کہا کہ خطے میں پائیدار امن صرف اقوامِ متحدہ کی قراردادوں کے مطابق استصوابِ رائے سے ہی ممکن ہے۔