’’یوم استحصال‘‘: پاک فوج کا کشمیری عوام سے غیر متزلزل یکجہتی کے عزم کا اعادہ

یومِ استحصالِ کشمیر کے موقع پر پاک فوج، بحریہ اور فضائیہ کی قیادیت نے مقبوضہ جموں و کشمیر کے غیور عوام سے غیر متزلزل یکجہتی کا اعادہ کرتے ہوئے شہدائے کشمیر کو زبردست خراجِ عقیدت پیش کیا ہے۔ انٹر سروسز پبلک ریلیشنز (آئی ایس پی آر) کے مطابق، فیلڈ مارشل سید عاصم منیر، چیف آف نیول اسٹاف اور چیف آف ایئر اسٹاف نے اپنے مشترکہ پیغام میں کشمیریوں کے حقِ خودارادیت کی مکمل اور اصولی حمایت کو دہرایا۔ مسلح افواج نے وادی میں جاری بھارتی فوجی قبضے اور انسانی حقوق کی سنگین پامالیوں پر شدید تشویش کا اظہار کرتے ہوئے واضح کیا کہ ایسے اقدامات علاقائی عدم استحکام اور انسانی مصائب کا باعث بن رہے ہیں۔ ترجمان کا کہنا تھا کہ جنوبی ایشیا میں پائیدار امن کا راستہ اقوامِ متحدہ کی قراردادوں اور کشمیری عوام کی خواہشات کے مطابق تنازع کے منصفانہ حل سے ہی ممکن ہے، اور پاکستانی قوم و افواج ہمیشہ اپنے کشمیری بہن بھائیوں کے شانہ بشانہ کھڑی رہیں گی