پنجاب کے بیشتر دریاؤں میں پانی کا بہاؤ معمول پر، 5 اگست تک بارش کی پیشگوئی

پنجاب ڈیزاسٹر مینجمنٹ اتھارٹی (PDMA) کے مطابق صوبے کے بیشتر دریاؤں میں پانی کا بہاؤ فی الوقت معمول کے مطابق ہے، تاہم دریائے سندھ میں کالاباغ کے مقام پر اور وزیر آباد کے نالہ پلکھو میں نچلے درجے کا سیلاب ریکارڈ کیا گیا ہے۔ پی ڈی ایم اے ترجمان کے مطابق کالاباغ پر پانی کی آمد 273,000 کیوسِک اور اخراج 266,000 کیوسِک ہے، جبکہ نالہ پلکھو میں پانی کا بہاؤ 3,000 کیوسِک ہے۔ ڈی جی پی ڈی ایم اے سیف انور جپہ نے بتایا کہ مون سون بارشوں کا چوتھا سلسلہ 05 اگست تک جاری رہنے کا امکان ہے، جس کے باعث لاہور، راولپنڈی، گوجرانوالہ، گجرات، سیالکوٹ، فیصل آباد اور ملتان میں اربن فلڈنگ، جبکہ مری اور گلیات جیسے پہاڑی علاقوں میں لینڈ سلائیڈنگ کا خدشہ ہے۔ انتظامیہ نے دریاؤں کے پاٹ میں موجود شہریوں کو فوری طور پر محفوظ مقامات پر منتقل ہونے کی ہدایت جاری کر دی ہے۔