سوات میں دہشتگردی ناقابل برداشت، حکومت شہریوں کا تحفظ یقینی بنائے: حافظ نعیم الرحمان

امیر جماعت اسلامی حافظ نعیم الرحمان نے سوات کے علاقے کبل میں پیش آنے والے دہشت گردی کے خونریز واقعے کی شدید الفاظ میں مذمت کرتے ہوئے حکومت اور سیکیورٹی اداروں سے شہریوں کی حفاظت کا فوری اور جامع انتظام کرنے کا مطالبہ کیا ہے۔ اپنے جاری کردہ ایک بیان میں انہوں نے واقعے میں معصوم شہریوں کے جاں بحق ہونے پر گہرے دکھ اور غم و غصے کا اظہار کیا اور کہا کہ سوات جیسے امن پسند علاقے میں دہشت گردی کا دوبارہ سر اٹھانا انتہائی تشویشناک اور بالکل بھی ناقابلِ برداشت ہے۔

حافظ نعیم الرحمان نے شہداء کے لواحقین سے دلی تعزیت اور ہمدردی کا اظہار کرتے ہوئے متاثرہ خاندانوں کے صبر و جمیل کے لیے دعا کی۔ انہوں نے انتظامیہ سے پرزور مطالبہ کیا کہ حادثے میں زخمی ہونے والے افراد کو ہنگامی بنیادوں پر بہترین اور مفت طبی سہولیات فراہم کی جائیں۔ امیر جماعت اسلامی نے حکومت اور تمام متعلقہ سیکیورٹی اداروں پر زور دیا کہ عوام کے جان و مال کے تحفظ کو ہر صورت یقینی بنایا جائے اور دہشت گرد عناصر و ان کے سہولت کاروں کے خلاف بلاامتیاز اور مؤثر کارروائی کی جائے تاکہ مستقبل میں ایسے دلخراش واقعات کا مکمل سدِباب ممکن ہو سکے