آزاد کشمیر انتخابات: نیئر بخاری کے ن لیگ پر دھاندلی کے الزامات، نتائج مسترد

پاکستان پیپلز پارٹی پارلیمنٹرینز کے سیکرٹری جنرل نیئر بخاری نے مظفر آباد میں ایک ہنگامی پریس کانفرنس کرتے ہوئے آزاد کشمیر انتخابات میں مسلم لیگ (ن) پر سنگین دھاندلی، بے ضابطگیوں اور جبر کے الزامات عائد کرتے ہوئے انتخابی نتائج کو مکمل طور پر مسترد کرنے کا اعلان کر دیا ہے۔ نیئر بخاری نے کہا کہ ن لیگ طاقت، جبر اور دھونس کے زور پر الیکشن جیتنا چاہتی ہے، جبکہ وہ 2024ء کے انتخابات کی طرح اس بار بھی غیر شفاف اور دھاندلی کے طریقوں سے کامیابی حاصل کرنے کی کوششوں میں مصروف ہے۔

سیکرٹری جنرل پی پی پی نے ایک انتہائی تشویشناک انکشاف کرتے ہوئے الزام لگایا کہ انتخابی عمل کے دوران پیپلز پارٹی کے ایک محنت کش کارکن مشتاق حسین کو قتل کیا گیا، جبکہ متعدد پولنگ اسٹیشنوں کے باہر مسلم لیگ (ن) کے نا دہندگان کھلے عام ووٹرز میں بیلٹ پیپرز تقسیم کرتے رہے۔ انہوں نے چیف الیکشن کمشنر سے مطالبہ کیا کہ وہ ان سنگین بے ضابطگیوں کا فوری نوٹس لیں۔ نیئر بخاری نے واضح کیا کہ موجودہ انتخابی عمل کو کسی صورت آزادانہ، منصفانہ اور شفاف قرار نہیں دیا جا سکتا، اس لیے پیپلز پارٹی ان مبینہ بے ضابطگیوں کے تحت سامنے آنے والے نتائج کو ہرگز تسلیم نہیں کرے گی۔