خاران میں سوشل میڈیا پروپیگنڈا کی مبینہ کوشش ناکام، سکیورٹی فورسز کے ردِعمل پر دہشتگرد فرار

بلوچستان کے علاقے خاران میں سیکورٹی فورسز کی بروقت اور مؤثر کارروائی کے باعث “فتنہ الہندوستان” سے منسلک دہشت گرد سوشل میڈیا پروپیگنڈا کے لیے ویڈیو بنانے کے عزائم میں ناکام ہو کر فرار ہو گئے۔ سیکورٹی ذرائع کے مطابق صوبے بھر میں فورسز کی مسلسل کامیاب کارروائیوں کے نتیجے میں دہشت گرد تنظیمیں میدانِ عمل میں شکست کے بعد اب محض سوشل میڈیا پر گمراہ کن بیانیہ قائم کرنے کی کوششوں تک محدود ہو چکی ہیں۔ یہ عناصر نرم اہداف (سافٹ ٹارگٹس) کو نشانہ بنا کر تصاویر اور ویڈیوز بناتے ہیں تاکہ انہیں پروپیگنڈے کے طور پر استعمال کیا جا سکے، تاہم خاران میں ان کی دراندازی کی کوشش کو فورسز نے ناکام بنا دیا۔

ذرائع نے بتایا کہ دہشت گرد سیکورٹی فورسز کی موجودگی یا آمد کا علم ہوتے ہی بدحواسی میں راہِ فرار اختیار کر لیتے ہیں۔ خاران میں بھی فرار ہوتے وقت دہشت گردوں کی جانب سے کی جانے والی اندھا دھند فائرنگ اور شیلنگ کے نتیجے میں معصوم بچوں سمیت 5 افراد زخمی ہو گئے۔ سیکورٹی ذرائع کا کہنا ہے کہ پرامن شہریوں، خواتین اور بچوں کو دانستہ نشانہ بنانا دہشت گردوں کی شدید بوکھلاہٹ اور حتمی ناکامی کا کھلم کھلا اظہار ہے، جبکہ فورسز ان کا مکمل صفایا کرنے کے لیے پرعزم ہیں۔