ہنگو میں بڑا کامیاب آپریشن، خزینہ بانڈہ چیک پوسٹ حملے میں ملوث مبینہ دہشتگرد مارا گیا

ضلع ہنگو کے علاقے چھپری نریاب میں محکمہ انسدادِ دہشت گردی (سی ٹی ڈی) اور سیکیورٹی فورسز نے انٹیلی جنس معلومات کی بنیاد پر ایک اہم مشترکہ آپریشن کرتے ہوئے خزینہ بانڈہ پولیس چیک پوسٹ پر ہونے والے خونریز حملے کے مبینہ ماسٹر مائنڈ کو ہلاک کر دیا ہے۔ سی ٹی ڈی حکام کے مطابق یہ کارروائی علاقے میں دہشت گردوں کی موجودگی اور نقل و حرکت کی مصدقہ اطلاعات پر کی گئی، جہاں شدید فائرنگ کے تبادلے کے بعد مرکزی منصوبہ ساز انجام کو پہنچا۔ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے۔

سی ٹی ڈی حکام نے اپنے عزم کا اعادہ کرتے ہوئے کہا کہ ملک میں امن و امان کے قیام کو سبوتاژ کرنے والے عناصر سے آہنی ہاتھوں سے نمٹا جائے گا اور دہشت گردی کے خاتمے تک بلاامتیاز کارروائیاں جاری رہیں گی۔ واضح رہے کہ 29 جولائی کو ہنگو کی خزینہ بانڈہ پولیس چیک پوسٹ پر دہشت گردوں کی جانب سے بزدلانہ حملہ کیا گیا تھا، جس کے نتیجے میں ڈی ایس پی سمیت 10 پولیس اہلکار شہید جبکہ 28 اہلکار زخمی ہوئے تھے۔