بانی پی ٹی آئی سمیت سیاسی قیدیوں کی رہائی اور نیشنل ڈائیلاگ کا آغاز کیا جائے: امیر جماعت اسلامی حافظ نعیم الرحمن

امیر جماعت اسلامی حافظ نعیم الرحمن نے اپنے ایک اہم ویڈیو بیان میں ملک کو درپیش سیاسی و معاشی بحران سے نکالنے کے لیے نیشنل ڈائیلاگ کے آغاز کا مطالبہ کرتے ہوئے بانی پی ٹی آئی سمیت تمام سیاسی قیدیوں کی فوری رہائی پر زور دیا ہے۔ انہوں نے کہا کہ نظام چلانے والے اپنی ناکامی کا اعتراف کر چکے ہیں، لہٰذا آئندہ عوامی رائے پر ڈاکا نہ ڈالنے کا عزم کیا جائے اور انتخابات متناسب نمائندگی کی بنیاد پر کرائے جائیں۔ عدالتی آزادی پر بات کرتے ہوئے ان کا کہنا تھا کہ ترامیم کے ذریعے یرغمال بنائی گئی عدلیہ کو آزاد کر کے ججز کی تعیناتی میرٹ پر کی جائے۔ معاشی اور زرعی اصلاحات کے حوالے سے حافظ نعیم الرحمن نے کہا کہ کیپیسٹی پیمنٹس کا بوجھ ختم کر کے بجلی سستی کی جائے، پاک ایران گیس پائپ لائن پر کام کا آغاز ہو اور جاگیرداری کا خاتمہ کر کے کوآپریٹو فارمنگ اپنائی جائے۔ انہوں نے تمام اداروں کو آئینی حدود میں رہنے، AI اور ڈیٹا سینٹرز کے قیام، مقابلے کا امتحان اردو میں منعقد کرنے، اور بلوچستان و کے پی کے مسائل کے لیے قومی کمیشن یا بڑا جرگہ تشکیل دینے کی تجویز بھی دی۔