ملک محمد اقبال چنڑ کی نماز جنازہ ادا، اہم شخصیات کی بڑی تعداد میں شرکت

قائم مقام سپیکر پنجاب اسمبلی ملک ظہیر اقبال چنڑ کے والد اور رکن قومی اسمبلی ملک محمد اقبال چنڑ کی نمازِ جنازہ بہاولپور سٹیڈیم میں ادا کر دی گئی ہے۔ نمازِ جنازہ میں سپیکر پنجاب اسمبلی ملک محمد احمد خان، وزیر مملکت ملک رشید احمد خان، وزیر مملکت عبدالرحمان کانجو، سیکرٹری جنرل پنجاب اسمبلی چودھری عامر حبیب، ملک تیمور خان، اور امجد مان سمیت کئی اہم شخصیات نے شرکت کی۔ اس کے علاوہ صوبائی وزراء میاں کاظم علی پیرزادہ، بلال اکبر خان، اراکینِ صوبائی اسمبلی رانا آفتاب اقبال، رانا شہباز، ملک ارشد، آر پی او بہاولپور غازی صلاح الدین، سول سوسائٹی کے نمائندوں اور عوام کی کثیر تعداد نے بھی شرکت کی۔

نمازِ جنازہ کی ادائیگی کے بعد سپیکر پنجاب اسمبلی ملک محمد احمد خان نے مرحوم کی مغفرت، بلندیِ درجات اور غمزدہ خاندان کے لیے صبرِ جمیل کی دعا کی۔ اس موقع پر انہوں نے قائم مقام سپیکر ملک ظہیر اقبال چنڑ سے دلی تعزیت کا اظہار کرتے ہوئے کہا کہ مرحوم ملک محمد اقبال چنڑ کی سیاسی، پارلیمانی اور عوامی خدمات کو ہمیشہ یاد رکھا جائے گا۔ وزیر مملکت ملک رشید احمد خان نے بھی سوگوار خاندان سے ہمدردی کا اظہار کرتے ہوئے کہا کہ وہ اس دکھ کی گھڑی میں برابر کے شریک ہیں۔