مبینہ جعلی پولیس مقابلہ میں نوجوان کی ہلاکت، 6 اہلکاروں کیخلاف مقدمہ درج

مبینہ پولیس مقابلے میں نوجوان کی ہلاکت اور ورثاء کی جانب سے شدید احتجاج کے بعد آئی جی سندھ نے واقعے کا فوری نوٹس لیتے ہوئے 6 پولیس اہلکاروں کے خلاف مقدمہ درج کرنے کا حکم دے دیا ہے۔

پولیس حکام کے مطابق تھانہ میراں پور میں ہلاک ہونے والے نوجوان علی حیدر کے بھائی کی مدعیت میں کیس درج کر لیا گیا ہے۔ ایف آئی آر میں فائٹر ٹو انچارج واحد چانڈیو، قائم ڈاھانی، نصیر الدین، ابراہیم، میر محمد اور دیگر پولیس اہلکاروں کو نامزد کیا گیا ہے۔ مقدمہ درج ہوتے ہی نامزد اہلکار قائم ڈاھانی کو گرفتار کر لیا گیا ہے۔

ایف آئی آر میں مدعی نے سنگین الزامات عائد کرتے ہوئے مؤقف اختیار کیا ہے کہ پولیس نے ان کے بھائی علی حیدر کو علاقے کے قریب سے پہلے گرفتار کیا اور بعد ازاں مخالفین سے رشوت لے کر اسے مبینہ مقابلے میں قتل کر دیا۔ پولیس کے مطابق واقعے کی تمام پہلوؤں سے تفتیش جاری ہے اور انصاف کے تقاضے پورے کیے جائیں گے۔