پیٹرول پر لیوی بھتہ ٹیکس، فارم 45 کی بنیاد پر جوڈیشل کمیشن بنایا جائے,حافظ نعیم الرحمٰن

جماعتِ اسلامی پاکستان کے امیر حافظ نعیم الرحمٰن نے پیٹرولیم مصنوعات کی قیمتوں میں مسلسل اضافے اور مہنگائی کے خلاف 07 اگست کو ملک بھر کی شاہراہوں پر جبکہ 03 اگست کو کراچی میں خواتین کے احتجاج کا اعلان کیا ہے۔ میڈیا سے گفتگو کرتے ہوئے انہوں نے کہا کہ 209 روپے فی لیٹر ایکس ریفائنری ریٹ والا پیٹرول لیوی اور بھتہ ٹیکسز شامل کر کے 336 روپے میں بیچا جا رہا ہے، جس سے 27 بنیادی اشیائے ضروریہ کی قیمتیں بڑھ چکی ہیں۔ آزاد کشمیر کی کشیدہ صورتِ حال پر تشویش کا اظہار کرتے ہوئے امیر جماعت اسلامی نے حکومت سے گولی کا استعمال روک کر مذاکرات کے ذریعے مسئلہ حل کرنے کا مطالبہ کیا۔ انہوں نے فارم 47 کی حکومت کو شدید تنقید کا نشانہ بناتے ہوئے کہا کہ ملک میں نظام کی اصلاح کے لیے فارم 45 کی بنیاد پر جوڈیشل کمیشن قائم کیا جائے، تمام سیاسی قیدیوں کو رہا کیا جائے اور بیوروکریسی، فوج اور سیاست دانوں کی غیر ضروری مراعات کا فوری خاتمہ کیا جائے۔