بھارت نے مسلسل گیارہویں مرتبہ سلال ڈیم سے پانی چھوڑ دیا، فلڈ الرٹ جاری

بھارت کی جانب سے مقبوضہ کشمیر میں واقع سلال ڈیم کے سپل ویز مسلسل گیارہویں مرتبہ کھول کر پانی چھوڑے جانے کے بعد پاکستان کے تمام متعلقہ اداروں کو شدید فلڈ الرٹ جاری کر دیا گیا ہے۔ بھارتی اقدام کے بعد تقریباً 90 ہزار کیوسک پانی کا بڑا سیلابی ریلہ پاکستان کی جانب پیش قدمی کر رہا ہے، جس کے باعث دریائے سندھ میں سیہون کے متعدد دیہات زیرِ آب آ چکے ہیں۔

محکمہ فلڈ فورکاسٹنگ کے مطابق، ملک کے دیگر اہم دریاؤں میں پانی کا بہاؤ فی الحال معمول کے مطابق ہے، تاہم دریائے سندھ میں مختلف بیراجوں پر نچلے سے درمیانے درجے کی سیلابی صورتحال برقرار ہے۔ اس وقت سکھر بیراج پر درمیانے درجے کا سیلاب ریکارڈ کیا جا رہا ہے، جبکہ کالا باغ، چشمہ اور گڈو بیراج اور دریائے راوی میں ہیڈ بلوکی کے مقام پر نچلے درجے کی سیلابی کیفیت موجود ہے۔ دوسری جانب تربیلا ڈیم 89 فیصد جبکہ منگلا ڈیم 57 فیصد تک بھر چکے ہیں۔

موجودہ صورتحال کے پیشِ نظر ضلعی انتظامیہ، نیشنل ڈیزاسٹر مینجمنٹ اتھارٹی (NDMA) اور ریسکیو اداروں کو ہمہ وقت الرٹ رہنے کی ہدایت جاری کی گئی ہے تاکہ نشیبی علاقوں کی آبادی کو بروقت محفوظ مقامات پر منتقل کیا جا سکے۔