کشمیر کےحالات کا حل پیپلزپارٹی کے پاس موجود ہے: بلاول بھٹو زرداری

پاکستان پیپلزپارٹی کے چیئرمین بلاول بھٹو زرداری نے پریس کانفرنس کرتے ہوئے کہا ہے کہ ہم کسی کو بھی اپنے ووٹ اور حق پر ڈاکا ڈالنے کی اجازت نہیں دیں گے، آزاد کشمیر کے فیصلے کا اختیار صرف کشمیری عوام کے پاس ہے۔ ان کا کہنا تھا کہ آزاد کشمیر کے 30 پولنگ اسٹیشنز پر قبضے کے ثبوت ان کے پاس موجود ہیں، جہاں ٹرن آؤٹ 99 فیصد دکھایا گیا، جبکہ تشدد اور بندوق کے زور پر الیکشن جیتنے والوں کو عوام نے مسترد کر دیا ہے۔

بلاول بھٹو زرداری نے زور دیا کہ کشمیر میں جاری حالات کا حل صرف پیپلزپارٹی کے پاس ہے۔ انہوں نے تمام اسٹیک ہولڈرز سے سچ اور مفاہمتی کمیشن قائم کرنے کا مطالبہ کیا جو ان بے ضابطگیوں اور حالات کی مکمل تحقیقات کرے۔ ان کا کہنا تھا کہ جب تک یہ کمیشن اپنی تحقیقاتی رپورٹ پیش نہیں کرتا، تب تک مزید احتجاج نہ کیا جائے، اور اگر کمیشن وزیراعظم آزاد کشمیر کو قصوروار ٹھہرائے تو احتساب کیا جائے۔

چیئرمین پی پی پی نے مظفرآباد میں فوری انٹرنیٹ سروس بحال کرنے اور چوہدری یاسین سمیت تمام متاثرہ پی پی امیدواروں کو نئی اسمبلی سے پہلے ان کی نشستیں دلوانے کا عزم ظاہر کیا۔ انہوں نے امید ظاہر کی کہ آزاد کشمیر انتخابات کے دوسرے مرحلے سے قبل ان کے جائز مطالبات اور شکایات کو سن کر فوری ازالہ کیا جائے گا۔