عراقی مسلح گروپ کا سعودی اور امریکی حملوں کا بدلہ لینے کا اعلان

عراقی مسلح گروپ ‘حرکت النجباء’ نے سعودی عرب اور امریکہ سے منسوب حالیہ حملوں کا بدلہ لینے کا باضابطہ اعلان کرتے ہوئے کہا ہے کہ ہر شہید کے خون کا حساب لیا جائے گا۔ عرب میڈیا رپورٹس کے مطابق گروپ نے اپنے ایک بیان میں موقف اختیار کیا کہ مشرق وسطیٰ اور بالخصوص عراق میں امریکی افواج کی موجودگی ملک کی سلامتی کے لیے سنگین خطرہ بن چکی ہے، لہٰذا امریکی پیش قدمی کو روکنے کے لیے ان کا فوری انخلا ناگزیر ہے۔ حرکت النجباء نے عراقی حکومت سے سعودی عرب کے ساتھ سیکیورٹی تعاون ختم کرنے اور ملک میں جدید فضائی دفاعی نظام تعینات کرنے کا مطالبہ کرتے ہوئے انتباہ جاری کیا ہے کہ اگر حملے نہ رکے تو ان کے ردِعمل کا دائرہ کار مزید وسیع کیا جائے گا، تاہم اس بیان پر عراقی، امریکی یا سعودی حکام کی جانب سے تاحال کوئی باضابطہ موقف سامنے نہیں آیا۔