گرین ٹاؤن میں بچی سے نازیبا حرکات کا ملزم زخمی حالت میں گرفتار

لاہور کے علاقے گرین ٹاؤن میں کمسن بچی سے نازیبا حرکات کرنے والے مرکزی ملزم کو پولیس نے مبینہ مقابلے کے بعد زخمی حالت میں گرفتار کر لیا ہے، جبکہ اس کا ایک ساتھی موقع سے فرار ہونے میں کامیاب ہو گیا۔ پولیس حکام کے مطابق ملزم نے چند روز قبل کمسن بچی سے نازیبا حرکات کی تھیں اور اس کی ویڈیو سوشل میڈیا پر وائرل ہوئی تھی، جس پر اعلیٰ حکام کی جانب سے ملزم کی فوری گرفتاری کے سخت احکامات جاری کیے گئے تھے۔

پولیس کا کہنا ہے کہ گرین ٹاؤن ناکے پر معمول کی چیکنگ کے دوران موٹر سائیکل پر سوار دو افراد کو رکنے کا اشارہ کیا گیا، تاہم انہوں نے رکنے کے بجائے پولیس پر سیدھی فائرنگ کر دی اور فرار ہونے کی کوشش کی۔ پولیس کی جانب سے تعاقب کے دوران ملزمان نے فائرنگ جاری رکھی، جس میں ایک ملزم اپنے ہی ساتھی کی فائرنگ کا نشانہ بن کر شدید زخمی ہو گیا۔

پولیس نے زخمی حالت میں گرنے والے ملزم کو حراست میں لے کر طبی امداد کے لیے ہسپتال منتقل کر دیا، جس کی شناخت محمد شبیر کے نام سے ہوئی ہے۔ پولیس حکام کا کہنا ہے کہ گرفتار ملزم ویڈیو میں نظر آنے والا مرکزی ملزم ہے، جبکہ موقع سے فرار ہونے والے اس کے دوسرے ساتھی کی گرفتاری کے لیے علاقے کی ناکہ بندی کر کے سرچ آپریشن جاری ہے۔