فیشن یا تاریخی ورثہ؟ زینڈایا پر 2 ہزار سال قدیم ایرانی بالیاں پہننے پر شدید تنقید

ہالی ووڈ کی معروف اداکارہ زینڈایا اپنے انوکھے فیشن اسٹائل کے باعث ایک بار پھر عالمی ذرائع ابلاغ کی توجہ کا مرکز بن گئی ہیں۔ تاہم اس مرتبہ ان کے ملبوسات سے زیادہ ان کے کانوں میں سجائی گئی دو ہزار سال سے بھی زیادہ قدیم ایرانی بالیاں (جھمکے) بین الاقوامی سطح پر بحث کا موضوع بن گئی ہیں۔

فلم ’دی اوڈیسی‘ کی لندن پروموشن کے دوران زینڈایا نے سونے کے ایسے نایاب جھمکے زیب تن کیے جنہیں ماہرین آثارِ قدیمہ قدیم ایرانی تہذیب کے نادر ترین نوادرات میں شمار کرتے ہیں۔ رپورٹس کے مطابق یہ طلائی زیورات ایران کے تاریخی ‘زیویہ خزانے’ (Ziwiye Hoard) سے منسوب ہیں، جن کا تعلق پہلی ہزار سال قبل مسیح سے ہے۔ یہ بالیاں لندن کی آرٹ گیلری ‘بیرون’ نے فراہم کی تھیں، جبکہ معروف جیولر گلین اسپائرو نے ان قدیم ٹکڑوں کو ہیروں کے ساتھ جدید شکل میں ڈھالا۔ جیولر کا کہنا تھا کہ ہزاروں سال پرانے تاریخی نوادرات کو جدید ڈیزائن کے ساتھ پہننا انہیں آج کے دور میں بھی منفرد بناتا ہے۔

جہاں ایک طرف زینڈایا کے اس لُک کو فیشن شائقین کی جانب سے سراہا گیا، وہیں دوسری طرف ماہرینِ آثارِ قدیمہ اور ثقافتی ورثے کے تحفظ کاروں نے اس پر سخت تشویش اور تحفظات کا اظہار کیا ہے۔ ماہرین کا کہنا ہے کہ ہزاروں سال پرانے نایاب تاریخی نوادرات کو محض ایک پرتعیش جیولری آئٹم کے طور پر نمائش کے لیے استعمال کرنا ان کی تاریخی اور ثقافتی اہمیت کو مجروح کرتا ہے، جبکہ متعدد ماہرین نے ان زیورات کی اصلیت اور ماخذ پر بھی سوالات اٹھا دیے ہیں۔